HRYÐJUVERK

Skrifa þetta vegna hryðjuverkanna í London.

Var að hlusta á viðtal við tvo sérfræðinga um hryðjuverkamál á Sky news. Þeir eru báðir múslimar. Þeir mæla með ströngu eftirliti og að það verði stöðvuð öll öfgavæðing islamista þar sem hún nær að skjóta rótum. M.a. í fangelsum, í moskum og að gætt verði að því hverjir séu að fjármagna byggingu moska. Það verði reynt að stöðva í fæðingu alla leiðtoga (imam) í söfnuðum múslima sem vilja öfgavæða. Þeir töluðu líka um að það þurfi að taka breyttar ákvarðanir í vopnaviðskiptum, bæði pólitískar og viðskiptalegar.

Það hefur líka komið fram í umræðum að þeir sem láta öfgavæðast séu oft viðkvæmir einstaklingar og jafnvel þeir sem hafa lent í fangelsum, svo ekki sé talað um heilaþvottinn sem er stundaður víða. Það hefur líka komið fram í umræðum að það verði að gera meiri kröfur til þeirra innflytjenda sem koma til Vesturlanda um aðlögun. Það sé farsælast fyrir innflytjendur sjálfa og íbúa Vesturlanda. Þessu er stór hluti innflytjenda sammála, en það hefur allt of mikið verið að gerast á Vesturlöndum að öfgaislam hafi fengið að grassera og hafi verið hlíft við gagnrýni af ótta fólks við líflátshótanir og að verða kallað rasistar.

Það eru ansi margir sammála því að tjáningarfrelsið verður að fá að ríkja og því fylgi að það megi gagnrýna öll trúarbrögð og alla hugmyndafræði og að ekki eigi að hlífa islam meira en öðrum trúarbrögðum eða annarri hugmyndafræði.

Í Kanada hafa innflytjendur verið að mótmæla yfirgangi islamista þar í sumum skólum, þótt viðkomandi innflytjendur séu sjálfir múslimar, sem vilja að sjálfsögðu að skólar verði óháðir trú og trúarbrögðum.

Það eru mjög margir sem óttast yfirgang öfgaislam og vilja alls ekki að það nái fótfestu í Vesturlöndum, sem því miður hefur gerst sumstaðar. Síðan er það stór galli á allri umræðu, þegar fólk fer að koma með tölur um að fleiri deyji í bílslysum, af slysaskotum og fleiru þegar talað er um dauðsföll af völdum hryðjuverka. Það er ekki hægt að afsaka eitt með öðru. Hryðjuverk eru heldur ekki slys. Þeim fylgir ásetningur. Hryðjuverk eru gerð til þess að drepa, skapa ótta og spila á meðvirkni fólks, sem telur að það sé farsælla að vera ekki að skipta sér neitt af þessu og alls ekki halla of mikið á þá sem valda. Á meðan nær viðbjóðurinn að grassera og grassera.

Öfgaislam er á bak við flest hryðjuverk sem múslimar fremja og líka á bak við illa meðferð á fólki, konum og börnum og ótal svívirðileg mannréttindabrot sem við á Vesturlöndum höfum unnið ötullega að því að uppræta. Það þarf að herða eftirlit og setja skýrari reglur, en ekki gefa eftir. Það hjálpar fólki, og ekki hvað síst friðsömum múslimum sem vilja alls ekki að þessi öfl nái fótfestu meira en orðið hefur og að þeim verði útrýmt með öllum ráðum.